2Th 2 | JAE | STEP | O lasitêwaac, aêac abe asôm biŋ êpi aêacnêŋ Apômtau Jesu Kilisi êmu êmêŋ to ênac aêac sa tapi tageŋ dawiŋ eŋŋa, tec ateŋ amac gebe.

2 Thessalonians 2

Ŋac geseŋ biŋsuŋa nê biŋ

1 O lasitêwaac, aêac abe asôm biŋ êpi aêacnêŋ Apômtau Jesu Kilisi êmu êmêŋ to ênac aêac sa tapi tageŋ dawiŋ eŋŋa, tec ateŋ amac gebe. 2 Lau sênam amacnêm kauc ôkwi-ôkwi sebeŋ to sêlênsôŋ amac atom. Êsêac oc sêsôm gebe Apômtaunê bêc gêmêŋ sugac. Êsêac oc sêŋgôliŋ biŋ êpi ŋalau, taŋ geoc biŋ tau lasê me êpi ŋac teŋ, taŋ kêsôm biŋ tau me êpi papia, taŋ sêsôm gebe aêac ato naŋ. 3 Alic taôm gebe lau teŋ sêŋgôm gêŋlêlôm gebe sênsau sêôc amac atomanô. Bêc tau oc êmêŋ atomgeŋ e ŋamalac sêkac tauŋ su aŋga Anôtônê êmuŋ ma ŋac geseŋ biŋsuŋa eoc tau lasê su acgom. Ŋac tau tonaŋ oc ênaŋa samucgeŋ. 4 Eŋ oc êkêŋ kisa êndêŋ Anôtô to nê sakiŋ samob. Ma eŋ oc etoc tau sa ma êŋgôŋ Anôtônê lôm dabuŋ to êtôc tau êndêŋ lau gebe eŋ Anôtô.

5 Biŋ tonaŋ kasôm gêdêŋ amac gêdêŋ taŋ gamoa gawiŋ amac naŋ. Amac oc taêm gêjam biŋ tau me masi. 6 Ma amac ajala gêŋ, taŋ kêkô eŋ auc gebe êmêŋ galoc atom naŋ. Eŋ eoc tau lasê êndêŋ noc, taŋ Anôtô êkêŋ naŋgeŋ. 7 Ŋaclai taŋ geseŋ biŋsu su naŋ, gêjam kôm gêmoa, tageŋ kêsiŋ tau gêc lêlômgeŋ. Êsiŋ tau e sêkôc ŋac, taŋ kêkô gêŋ tau auc naŋ, su acgom. 8 Go ŋac geseŋ biŋsuŋa eoc tau lasê. Ma Apômtau Jesu oc ênac eŋ êndu ŋa nê awajaô. Ma Apômtau embe êmêŋ toŋawêgeŋ, go ŋawê tau enseŋ eŋ su amboac tonaŋ. 9 Ŋac geseŋ biŋsuŋa oc êmêŋ toSadaŋnê ŋajaŋa ma êŋgôm gêŋ ŋaclaiŋa tokaiŋ-tokaiŋ ma gêŋtalô to gêŋsêga dansaŋŋa. 10 Ma eŋ êns u êôc êsêac, taŋ sênaŋa naŋ, ŋa dansaŋ tokaiŋ-tokaiŋ. Êsêac oc sênaŋa gebe têntac gêwiŋ biŋŋanôŋa gêc êsêacŋa atom. Embe têntac êwiŋ biŋŋanô, oc Anôtô ênam êsêac kêsi. 11 Kêtu tonaŋŋa Anôtô êkêŋ ŋaclai dansaŋŋa êôc êsêac gebe sêkêŋ êwiŋ biŋdansaŋ, 12 gebe êsêac samob, taŋ sêkêŋ gêwiŋ biŋŋanô atom ma têntac gêwiŋ biŋ geo ŋawaô naŋ, Anôtô êmêtôc êsêac e sênaŋa.

Anôtô kêjaliŋ aêac sa gebe daŋgôŋ mateŋ jali

13 O lasitêwaac, Apômtau têtac gêwiŋ amac tec aêacma ŋalêlôm kêkac aêac e ajam daŋge Anôtô kêtu amacŋa ŋapaŋ, gebe Anôtô kêjaliŋ amac sa gêdêŋ andaŋgeŋ ma Ŋalau Dabuŋ kêkêŋ amac atu Anôtônê lau e akêŋ gêwiŋ biŋŋanô tau, tec Anôtô gêjam amac kêsi. 14 Anôtô kêkêŋ aêac asôm ŋawae ŋajam, taŋ kêkalem amac naŋ, gebe amac akôc aêacnêŋ Apômtau Jesu Kilisi nê ŋawasi sa. 15 O lasitêwaac, amboac tonaŋ akô ŋajaŋa ma amansaŋ mêtê, taŋ aêac adôŋ gêdêŋ amac naŋ. Biŋ ŋagêdô asôm ŋa aweŋgeŋ ma ŋagêdô ato kêsêp papia.

16 Aêacnêŋ Apômtau Jesu Kilisi agêc Tameŋi Anôtô tau, taŋ têtac gêwiŋ aêac to kêmoasiŋ aêac tamoa teŋgeŋ totêntac malôgeŋ ma takêŋ mateŋ ŋanô ŋajam ôŋa tau naŋ, 17 ênam malô nêm ŋalêlôm to êpuc amac tôŋ gebe aŋgôm gêŋ samob to asôm biŋ samob ŋajamgeŋ.